شنطتك ضاعت في المطار ؟ متقلقش ! (مقال بالعامية المصرية)

من مواضيع السفر المهمة اللي كنا عاوزين نتكلم معاكم عليها من فترة ولقينا أن دلوقتي هو الوقت المناسب بما اننا في موسم الصيف وكتير مننا بيحب يسافر بره مصر يروح مثلا إسطنبول او أمستردام أو باريس وديزني أو موسكو أو كازابلانكا  او يحجز شهر عسل في بالي أو بوكيت أو لانكاوي  أو المالديف أو زنجبار في الوقت ده من السنة بالذات.

الموضوع ده هو إزاي تحافظ على شنطتك من الضياع في المطار وايه الحاجات اللي ممكن تعملها عشان تقلل حدوث ده
ولو لقدر الله الشنطة ضاعت فعلا وموصلتش مطار المدينة اللي انت مسافر لها .. ايه هي الإجراءات اللي تعملها واللي بتضمن ان شنطتك ترجع لك بنسبة كبيره ان شاء الله.

اول حاجه هي إنك تأخد بالك وانت بتشتري شنطة السفر أصلاً من حبة حاجات صغيرة ولكنها مهمة جدا وبتفرق ... زي خامة الشنطة . دايما اختار خامة شديدة متتقطعش او تتكسر بسهولة – قماش شديد مثلا او سليكون محترم او خامة البولي كاربونيت - ولو مقدرتش … في خدمة في المطار وهي انك تقدر تلف الشنطه بـ بلاستيك استرتش يحميها من الخبطات وهي بتتنقل من الكاونتر للطيارة.

تاني حاجه لون الشنطة – ايوه فعلا لون الشنطه بيفرق جداً في ان شنطتك متضعش أو بالأصح حد تاني يتلخبط ويأخد شنطتك مكان بتاعته – يعني تخيل معايا مثلا في كام واحد في المطار معاه شنطه لونها اسود – انما لو انت لون شنطتك مميز زي مثلا الفسفوري او الأحمر كمثال يعني.  ده هيقلل احتمالية ان حد تاني يتلخبط ويأخدها ... ده غير انه هيكون سهل عليك تميزها وهي على سير استلام الشنط ف مطار وجهة الوصول ... ولو مقدرتش تلاقي لون مميز . ممكن تشتريLuggage Cover  للشنطة يكون شكله مميز ويحافظ عليها كمان.

طبعا من الحاجات الأساسية بردو ان شنطتك يكون ليها Luggage tag ودي زي بطاقة بيكون مكتوب فيها بياناتك الأساسية زي إسمك وتليفونك وعنوانك واي وسيلة للتواصل معاك في حال الشنطة ضاعت لاقدر الله (خلي  tag في الشنطه من بره وحط tag كمان في الشنطه من جوه) وفي  كمان tags  حديثة بيكون فيها QR Code  لما تعمل Scan  بالموبايل هتظهر بياناتك كلها . وفي طبعا الـ Air Tags  لو معاك ايفون بتقدر تعمل بيها Tracking للشنط بتاعتك وتعرف مكانها لحظه بلحظه وهو كمان متوفره للأندرويد بس طبعا بأسماء مختلفة في السوق ... و الـ Tracking Tags  دي من أفضل الحلول لتتبع شنطتك وده لو توفرت الإمكانية لشرائها.

وبردو من الحاجات الروتينية اللي ممكن تعملها وتقلل احتماليات ان شنطتك متوصلش مطار المدينة اللي انت رايحها هي انك تأكد على موظف شركة الطيران وانت على الكاونتر انك هتستلم شنطتك دي في الوجهه النهائية ومش في مطار الترانزيت – بمعنى انك مثلا مسافر لبلد شنجن من القاهرة لـ ليتوانيا مثلا وهيكون عندك ترانزيت ف تركيا – فإنت في الحالة دي بتأكد على موظف شركة الطيران انك هتستلم شنطك في الوجهه النهائيه اللي هي ليتوانيا مش في بلد الترانزيت اللي هي تركيا في المثال بتاعنا. كده كده الموظف هيكون فاهم وهيعمل كده فعلا بس ده لا يمنع إنك تأكد عليه مرة تانيه.

وكمان كل ما كانت مدة الترانزيت معقوله (من 3 إلى 4 ساعات) مش أقل من كده (ساعه مثلا) ده بيقلل إحتمالية ان الشنطة متلحقش تطلع معاك على طيارة الوجهه النهائية بعد الترانزيت.

وحاول قدر المستطاع انك ميكونش معاك شنط كتير وانت مسافر او راجع عشان تقلل التوتر اثناء السفر وتبقى عارف عدد الشنط بتاعتك ومحتويات كل شنطة وتقلل احتمالية انك تنسى شنطه منهم في المطار – يعني الأسهل إنك تسافر مثلا بشنطتين ولا إنك تسافر بـ 5 شنط ؟!! ومتنساش كمان تصور الشنط بتاعتك بكاميرا الموبايل واوعى تحط فلوس او حاجات غاليه في الشنط اللي هتسبها على الكاونتر . دايماً خلي الحاجات المهمه في شنطتك اللي هتطلع معاك على الطياره.

طبعا مش محتاجين نقولك انك تحافظ جداًعلى الـ Boarding pass حتى بعد لما تطلع الطيارة ... لان بيكون ملزوق ف ضهره استيكر صغير كده عليه أكواد فيها كل بيانات الشنط بتاعتك واللي هتكون أهم حاجه هتطلب منك في حالة لاقدر الله الشنط ضاعت او موصلتش لمطار البلد اللي انت رايحها.

بالإجراءات اللي قولناها فوق دي هتقدر تقلل إلى حد كبير ان الشنط بتاعتك تبوظ أو تتوه أو حد يتلخبط ويأخدها او حتى متوصلش مطار المدينة اللي انت رايحها ولكن لو قدر الله والشنط ضاعت فعلا ايه باه الإجراءات اللي هتم في الحاله دي ...

أهم حاجه انك متتوترش عشان تقدر تفكر وتتصرف صح ...

بس قبل ما نقول ان الشنط ضاعت او تاهت لازم نتأكد من كده فعلا بشويه حاجات بسيطه زي إنك تتأكد انك واقف قدام سير الشنط الصح لإن احيانا المطار لما بيكون كبير بيكون في اكتر من سير شنط وبتكون انت واقف قدام سير مش بتاع طيارتك . تقدر تتأكد انك قدام السير الصح بأنك بتشوف الشاشه اللي فوق سير الشنط لو مكتوب عليها رقم رحلتك يبقى انت واقف قدام سير الشنط الصح.

ويفضل تكون صبور وتنتظر لحد وصول اخر شنطه على السير لإنها جايز تكون شنطتك اللي انت منتظرها او فاكرها ضاعت !

ولكن لو إتأكدت انها فعلا منزلتش على السير بتروح بسرعه لموظف شركة الطيران وتبلغه ان شنطتك موصلتش وهناك هيطلب منك شويه بيانات هتلاقيها موجوده على الإستيكر الصغير الملصق على الـ Boarding Pass اللي قولنا عليه فوق وهيطلب منك كمان وصف للشنطه ووصف لمحتوياتها وبيانات التواصل معاك في حال انهم لقوا الشنطه فعلا.
وهيطلب منك انك تملى استماره بتفيد ان شنطتك فقدت فعلا وهيسلموك نسخه من الإستماره دي . طبعا متنساش تتابع مع قسم المفقودات في المطار عشان تعرف وصلوا لفين في رحلة البحث عن شنطتك.

وغالباً بينتهي الأمر نهاية سعيدة :)  انهم بيلاقوا الشنطة فعلا حتى لو بعد كام يوم من البحث وبنسبه كبيره بتلاقي الشنطة ومحتوياتها بدون اي مفقودات او تلفيات ولو لا قدر الله لقيت الشنطة مفتوحه او باظت او ضاع منها حاجه بيكون ليك الحق إنك تطلب تعويض من شركة الطيران وده هنتكلم عنه المره الجايه ان شاء الله ...

ودلوقتي نقدر نقولك حمدا لله على سلامة وصولك انت والشنطة :) وبس كده ...