إزاي تقرأ تذكرة الطيران بتاعتك؟ (مقال بالعامية المصرية)

مبرووك !!! خلاص إشتريت تذكرة الطيران بتاعتك وخلاص هتسافر لأول مرة ؟

طب تفتكر تذكرة الطيران هي بس كل اللي انت محتاجه عشان تطلع على الطيارة ؟

فـ معلومة النهاردة هنتعرف على الفرق بين تذكرة الطيران والـBoarding Pass  وايه هي أهم الرموز والمعلومات اللي موجودة فيهم عشان تقدر تسافر بكل ثقة ...

ناس كتير ممكن تفتكر إن تذكرة الطيران (Flight Ticket) وبطاقة صعود الطائرة (Boarding Pass) هم حاجة واحدة ... بس الحقيقة إنهم بيختلفوا عن بعض في شوية حاجات ...

الـ Flight Ticket  هي مستند أو زي ما بنقول بالعامية - الورقة اللي بتثبت إنك بالفعل حجزت أو إشتريت مكان في طيارة رحلة معينة سواء كانت الورقة دي مطبوعة أو ديجيتال على إيميلك أو موبايلك واللي بنقول عليها في الحالة دي E-Ticket

الـ Boarding Pass هو البطاقة اللي بتسمح ليك إنك تركب الطيارة اللي انت حجزت عليها رحلتك عشان وجود تذكرة الطيران لوحدها معاك مش بيضمن ليك إنك تركب الطيارة وتسافر ...

الأول في إجراءات وخطوات أساسية بتتعمل عشان تأخد الـ Boarding Pass وبعدين تطلع الطيارة وتسافر ... زي إنك توصل المطار قبل الرحلة بوقت كافي (3 ساعات قبل معاد الرحلة بيكون كويس) عشان تعمل Check in  في المطار (وممكن  بردو تعمل Online check in وده بيكون حسب الإمكانية فـ خطوط الطيران  ) وتستلم الـ Boarding Pass  من الموظف على الكاونتر وبعدها تعدي كل نقاط التفتيش في المطار وتعدي كل البوابات وتطلع سلم الطيارة ... وبدون الخطوات دي تذكرة الطيران ممكن تروح عليك وتخسر فلوسك (حسب شروط الإلغاء والتعديل بتاعت تذكرة الطيران اللي بتحددها كل خطوط طيران)

تعالاً بقى دلوقتي نشوف ايه هي أهم المعلومات اللي بتكون موجودة في تذكرة الطيران بتاعتك (Flight Ticket)

• بتلاقي عندك إسمك (الإسم الأول واللقب) زي الموجود في الباسبور بالظبط
• رقم التذكرة  (E-Ticket NO) (وده لو الحجز مؤكد مش حجز مبدئي)
• الرقم المرجعي لحجز خطوط الطيران (Airline Booking Reference)
• رقم رحلتك وإسم خطوط الطيران
• صالة المغادرة والوصول (Terminal)
• وزن الشنط المسموح ليك
• الوجبة أثناء الرحلة (إن وجدت)
• مواعيد رحلتك سواء كانت التذكرة إتجاه واحد أو ذهاب وعودة
  وهنا خلي بالك من حاجة مهمة جداً وهي إن مواعيد الرحلة بتكون بنظام الـ 24 ساعة يعني هتلاقي الساعه مكتوبه زي 20:00 ودي هنا معناها الساعه 8 مساءً وهكذا  …وكمان خلي بالك من حاجه مهمة وهي إن التوقيتات بتكون بتوقيت البلد اللي انت بتكون فيها ... يعني كمثال لو مسافر (ذهاب من القاهرة لـ إسطنبول) - هنا توقيت المغادرة هيكون بتوقيت مصر وتوقيت الوصول هيكون بتوقيت تركيا والعكس لو مسافر (عودة من إسطنبول لـ القاهرة ) – هنا توقيت المغادرة هيكون بتوقيت تركيا وتوقيت الوصول هيكون بتوقيت مصر ... والنقطة دي محورية عشان تظبط مواعيد رحلتك والرحلة متروحش عليك

وبالنسبة للـ Boarding Pass فـ أهم المعلومات والـرموز اللي بتكون فيه :

• إسمك (الأسم الأول واللقب) ولازم بردو يكون مطابق تماماً للإسم فـ تذكرة الطيران
• الـ (Barcode) وده اللي بيتعملة Scan فـ الـ Boarding Gate  
• الـ PNR (Passenger Name Reference)
  وكل من الباركود و الـ  PNR بيكون فيهم معلومات بتهم خطوط الطيران عنك وعن رحلتك
• رقم الرحلة (Flight Number)  ومدن الذهاب والعودة
• فئة التذكرة (Ticket Class)  واللي بتكون عبارة عن رموز بيستخدم فيها الحرفين "A" و "F لمقاعد الدرجة الأولى / رجال الأعمال و الحرفين" Y "و" Q "للمقاعد الاقتصادي.
• رقم الكرسي والصف  ودول عشان تعرف مكان الكرسي بتاعك في الطيارة وهتلاقي مضيف/مضيفة الطيران بيوجهوك للطريق ليهم أول لما بتطلع الطيارة.
• الـ Boarding Group  ودي هي المجموعات اللي بتنظم بيها خطوط الطيران الركاب عند بوابة الصعود للطياره  وبيستخدم في الرمز ده حروف أو أرقام وغالباً بيتم تخصيص مجموعات الصعود الأولى للمسافرين من الدرجة الأولى / رجال الأعمال أو الركاب ذوي القدرات الخاصة.
• رقم البوابة (Gate Number) ودي هي البوابة التي هتطلع منها للطيارة وهتلاقي رقم البوابه بردو على شاشات المعلومات الموجودة في المطار وهنا خلي بالك ان رقم البوابة ممكن يتغير فـ اي لحظه فدايماً خلي عينك على شاشات المعلومات اللي بتكون في المطار .
  
  وكده اللي باقي لك يا سيدي إنك تستمتع برحلتك ... رحلة سعيدة :)