التصريح الأمني مش بعبع ! (مقال بالعامية المصرية)

مقالنا النهاردة مكتوب مخصوص للناس اللي كانت بتخطط لسفرية ما ولكن أثناء ما هما بيجهزوا ورق السفر إكتشفوا إن الدولة اللي هما رايحنها بتحتاج تصريح أمني !!! هل بقى التصريح الأمني ده صعب ومشكلة زي ما هو باين من إسمه كده ؟! ولا هو مجرد حاجه روتينية وسهلة  لو جهزت الورق المطلوب ليه ؟!    
خد نفس عميق وإسترخي وتعالي بقى أقولك كل حاجه عن التصريح الأمني فـ كبسولة ...

يعني ايه تصريح امني ؟
ناس كتير بتتلخبط  بين التصريح الامني و تصريح السفر، فلازم نعرف الفرق بينهم.
التصريح الامني :
هو موافقه من الجهات الأمنية المختصة على سفرك إلى بعض الدول و بيكون مطلوب من المسافرين المصريين من مصر بس.
تصريح السفر :
بيستخرج من وزارة الدفاع للشباب في سن التجنيد أو من إداره التجنيد والتعبئة.

نقدر نطلع التصريح الامني منين  ؟
المكان الوحيد في مصر اللي بيطلع التصريح الأمني هو الادارة العامه للجوازات و الهجرة في العباسية فقط ، يعني لو أنت من محافظة تانية ومسافر تركيا مثلا ، تروح القاهره الأول تطلع التصريح الامني منه ، والمكان ده كمان ممكن تستخرج منه جواز السفر

هل في سن معين لاستخراج التصريح الامني ؟
التصريح الأمني مطلوب من الجميع - الذكور والإناث والسن من ١٢سنه لـ ٤٠ سنه -
لو سنك أقل من ١٢ سنه أو أكبر من ٤٠ سنه مش هتحتاج تصريح أمني.

ايه الدول اللي لازم تستخرج لها تصريح امني ؟
تركيا - العراق - سوريا – قطر - لبنان - ليبيا - ايران  - جورجيا - السودان  - اليمن - الاردن  - ماليزيا - غينيا – اندونسيا.
وخلى بالك .. قايمة الدول بتتحدث كل فترة.. فاسأل الأول قبل ما تاخد قرار السفر.

التصريح الامني بياخد وقت قد ايه عشان يتم استخراجه ؟
بياخد يومين تقريبا.

ايه هي صلاحية  التصريح الامني  ؟
التصريح الأمني صالح لمدة شهرين من تاريخ إصداره وبيستخدم لسفرية واحدة فقط .

امتي ميتطلبش منك التصريح الامني ؟
مش بيطلب منك التصريح الامني لما يكون جواز سفرك مثبوت فيه الوظيفه لو انت مسافر واحدة من البلاد دى:
لبنان – ماليزيا – اندونسيا.

طيب مين يقدر يحصل على التصريح الامني ؟
التصريح بيستخرج في الحالات دي :
•    إنك تكون موظف و جواز سفرك مكتوب فيه وظيفة ومسجل بالتأمينات.
•    لو أنت صاحب عمل لازم السجل التجاري والبطاقة الضريبية.
•    لو المهنه من المهن النقابية زي مهندس حر او صيدلي حر أو ما شابه لازم يكون معاك كارنيه النقابة ويكون ساري وانت بتقدم ع التصريح الأمني.
لو مش موظف هتعمل ايه :
لو طالب او حاصل على بكالوريوس لازم يكون مبعوتلك تأشيره زياره من البلد اللي انت رايحلها عشان يتم استخراج التصريح الامني

ايه الاوراق المطلوبه  والخطوات عشان تعرف تستخرج التصريح الامني ؟
•    أصل جواز السفر.
•    أصل البطاقة الشخصية.
•    خطاب من جهة العمل ( HR Letter ) يوضح الوظيفة حتي تاريخ الطلب ومكتوب باللغة العربية وموجه الي إدارة الاتصال بمصلحة الجوازات والهجرة .
•    برنت تأمينات من مكتب التأمينات يكون موجه الي إدارة الإتصال بمصلحة الجوازات والهجرة ومختوم بختم النسر.
•    صورة بطاقه الأب أو شهادة الوفاة فى حالة وفاة الأب أو القيد العائلى فى حالة سفر الأب.
•    صورة للباسبور .
•    صورة للتأشيرة.
•    إستمارة تقديم الطلب من مصلحه الجوازات والهجرة في العباسية.

 بعد ما نملى كل البيانات المطلوبة في الاستمارة ونسلمها هيحددولنا ميعاد الاستلام ... وبس كده !