إزاي تقرأ إستيكر الفيزا الشنجن؟ (مقال بالعامية المصرية)

لو متابع بوستات الفيزا الشنجن هتلاقي إننا ماشيين معاك بالترتيب عشان تشوف التجربة كاملة ... يعني في الأول إزاي إنك تجهز ورقك وتقدم على الفيزا الشنجن وبعدين تعمل إيه لو قدمت ولا قدر الله إترفضت إوزاي تكتب جواب التظلم ... النهاردة بقى هنقولك إزاي تقرأ إستيكر الفيزا الشنجن اللي هتلاقية فـ باسبورك لو الحمد لله الفيزا جت وخلاص هتسافر ...

الموضوع للوهلة الأولى يبان بسيط ومفهوش حاجة ... يعني زي ما بنقول بالعامية مش قصة يعني أقرأ الفيزا إزاي !!! بس الحقيقة غير كده خالص !!! لإنك لو أول مرة تسافر أوروبا ومفهمتش المعلومات والرموز المكتوبة في الفيزا بتاعتك ده بيعرضك (من غير ما تكون واخد بالك) إنك تعدي المدة المسموحة لإقامتك السياحية هناك وتواجه مشاكل رخمة لـ كسر الفيزا واللي ممكن بتوصل إنك تترحل أو تدفع غرامة كبيرة باليورو أو تتمنع من دخول منطقة الشنجن تاني لمدة بتوصل لـ 3 سنين وممكن 5 سنين كمان !!!

• أول حاجة لازم تعملها أول لما تستلم باسبورك من مركز التقديم وتلاقي الفيزا ...  هو إنك تراجع إسمك المكتوب في إستيكر الفيزا زي ما بنقول بالعامية (حرف حرف) وتراجع كمان رقم باسبورك.
   
• عندنا بعد كده (رقم الفيزا) وده يا سيدي هلاقيه موجود فوق على ايدك اليمين وغالباً بيبدأ بـ (0) أو (00) وهتلاقيه بردو موجود جنب صورتك (مكتوب بخط أحمر بالطول) وهتلاقي تحتيه بحاجة بسيطة رمز مكون من 3 حروف . الرمز ده هو إختصار لإسم البلد اللي انت قدمت إنك تسافر لها ... زي مثلا دولة Latvia  إختصارها في الفيزا هيبقى LVA  وهكذا.
   
• بعد كده هتلاقي خانة مكتوب فيها (Valid For) ودي بتقولك ايه هي الدول اللي مسموح ليك دخولها في منطقة الشنجن وغالباً هتلاقي مكتوب فيها (Schengen States) ودي معناها إنك مسموح ليك بدخول جميع دول منطقة الشنجن . بس خد بالك في بعض الأحيان النادرة ممكن تلاقي الجملة دي مش مكتوبة ومكتوب بدالها رمز أو أكتر من رمز . والرمز الواحد مكون من حرفين زي مثلا DE وده معناه إنك مسموح ليك الدخول فقط للدولة اللي الرمز بتاعها مكتوب – هنا مثلا DE  لـ (ألمانيا) وفي رموز لدول تانيه زي ES لـ (أسبانيا) و FR (فرنسا) وNL (هولندا) و IT (إيطاليا) وهكذا ...
   
• عندنا بعد كده خانتين مكتوب فيهم (From)  و (Until) ودول هتلاقي فيهم التواريخ اللي هيكون مسموح ليك فيهم الدخول والخروج من منطقة الشنجن ... وهنا خلي بالك من نقطة مهمة جداً جداُ وهي إنك مثلا لو مكتوب لك تاريخ في خانة Until  وليكن 22-4-2023 فـ ده معناه إنك لازم تغادر منطقة الشنجن قبل ما يوم 22 يخلص ... لإن لو اليوم ده خلص وعديتة ولو يكن بـ دقيقة واحده ... يعني الساعة مثلا 12 بليل ودقيقة ودخلت في اليوم اللي بعديه اللي هو 23 ... فـ ده معناه إنك كسرت الفيزا ... جايز تقول ده انا عديت اليوم 22 بفارق دقيقة واحده بس ... لو عملت كده فـ ده معناه في قوانين السفر إنك دخلت في يوم جديد ... اللي هو 23 ... وهيبقى انت للأسف كسرت الفيزا بـ يوم كامل اللي هو يوم 23 مش كسرت الفيزا بدقيقة واحدة وهيفضل فـ سيستم الفيزا الشنجن في سفارات دول المنطقة كلها إنك كسرت الفيزا بتاعتك بـ يوم كامل ... وده هيوصلنا لحتة الترحيل او الغرامة او المنع من دخول الشنجن تاني زي ما قولنا في البداية .
   
• ملحوظة تانيه بالنسبة للتاريخ المكتوب في خانة (From) التاريخ ده ينفع تدخل منطقة الشنجن بعديه مش قبليه ... ومش لازم تسافر بالظبط في اليوم المكتوب في خانة (From) ممكن تسافر بعديه عادي.
   
• نيجي باه لخانة جديدة وهي (Duration of stay) ودي فيها إجمالي عدد الأيام اللي مسموح ليك إنك تفضل فيها جوه منطقة الشنجن ... ولازم متعديش إجمالي عدد الأيام دي بأي حال من الأحوال وإلا تكون كسرت الفيزا بتاعتك !!! وخلي بالك بردو من نقطة مهمة جداً جداً ... وهي إن عدد الأيام دي بتبتدي تتحسب من اليوم اللي فعلا دخلت فيه منطقة الشنجن ومش من التاريخ الموجود في خانة From  اللي شوفناها في النقطة السابقة... يعني لو في خانة From   تاريخ زي 20-4 بس إنت دخلت وليكن مثلا يوم 22 -4 في الحالة دي الـ duration of stay بتتحسب من يوم 22 مش من يوم 20 .
   
• غالباً هتلاقي إن عدد الأيام اللي ما بين خانة (From)  و (Until) أكبر من عدد الأيام اللي موجودة في خانة (Duration of stay) وده عشان يكون عندك فرصة تقدر فيها تظبط وترتب سفريتك زي ما انت عاوز . يعني تحجز طيران وفندق بسعر مناسب وكده.
   
• بعد كده خانة (Type of visa) وهتلاقي في الخانة دي حروف زي C  أو A  أو D – الحروف دي يا سيدي بتقولك نوع الفيزا بتاعتك ... يعني حرف الـ C معناه إقامة قصيرة سواء للسياحة أو البيزنس أو العلاج وهكذا. الحرف A هو إختصار للفيزا الترانزيت والحرف D معناه إقامة طويلة زي الإقامة بغرض الدراسة وكده.
   
• دلوقتي معانا خانة (Number of entries) ودي هتلاقي مكتوب فيها أرقام زي 01 أو 02 أو كلمة MULT والخانة دي بتقولك عدد المرات المسموح ليك فيهم دخول منطقة الشنجن – 01 دي يعني دخول مرة واحدة و 02 يعني دخول مرتين و MULT  يعني دخول كذا مرة (متعدد) ... وهنا خلي بالك إنك بعد لما تخلص عدد مرات الدخول دي سواء مرة أو إتنين أو أكتر هتكون الفيزا بتاعتك ساعتها غير صالحة او expired 
   
• هنا معانا نقطة مهمة جداً – فاكر الحتة بتاعت الـ Duration of stay اللي فيها إجمالي عدد أيام وجودك في منطقة الشنجن ؟ طب ليه بنقول إجمالي الأيام ؟ بنقول إجمالي الأيام لإنك إفترض معايا السيناريو ده ... إنك أخدت الفيزا MULT (متعددة الدخول) ودخلت أول مرة قعدت مثلا 5 أيام وخرجت ... وبعدين دخلت مرة كمان مثلا 8 أيام وخرجت ... كده إجمالي الأيام بتاعتك 13 يوم ... تعالا نفترض بردو في السيناريو ده إن معاك Duration of stay عشر أيام بس . كده إنت إجمالي الأيام بتاعتك اللي هو 13 يوم عدى الـ 10 أيام بتوع الـ Duration of stay ويبقى في الحالة دي إنت كسرت الفيزا !!! اللي حاببين نأكد عليه هنا ... إن إجمالي عدد أيام دخولك في مرات دخول 02 او   MULT ميعديش خالص عدد الأيام بتاعت الـ Duration of stay
   
• باقي عندك خانات زي Passport No. ودي فيها رقم باسبورك طبعاً اللي قلنا فوق إنك لازم تراجعه أول لما تستلم التأشيرة ... وعندك خانة Issued in  ودي هتلاقي فيها إسم المدينة اللي تم إصدار الفيزا منها زي مثلا في مصر هتلاقي مكتوب مدن زي القاهرة (Cairo) وهكذا ... وهتلاقي خانة On  اللي هيكون مكتوب فيها التاريخ اللي تم إصدار الفيزا بتاعتك فيه ... وأخر خانة معانا هي Surname, Name ودي فيها إسمك الأول ولقب عائلتك اللي قلنا في أول المقالة إنك لابد تراجع عليهم أول لما تستلم الفيزا بتاعتك.
  
  وبس كده ... ومبروك إستلام الفيزا  :)