إزاي تتحرك وإنت مسافر؟ ( مقال بالعامية المصرية)
واحد من الأسئلة المحورية اللي بتلاقيها جت فـ دماغك وانت بتجهز لسفريتك هو إزاي هتتحرك جوه البلد اللي انت مسافرها ؟
وايه هي المواصلات المتاحة هناك ؟ وايه منهم سعره يكون معقول ؟
تعالا بقى النهاردة نقولك كل الأوبشنز المتاحة ليك كمواصلات وانت مسافر وطبعاً كل أوبشن من دول بيعتمد على الميزانيه اللي انت حاططها لبند المواصلات ...
أول اوبشن عندك هو التاكسي ... وده اختيار احنا مش بننصح بيه نظراً ان سعرة دايما بيكون غالي جداً حتى مع المشاوير اللي مش بعيدة ...
تاني أوبشن عندنا هو الباص والترام والأوبشن ده سعره مناسب جداً وفي اغلب دول أوروبا بتقدر تجيب كارت الباص من اي كشك أو سوبر ماركت صغير او ممكن كمان أونلاين ده غير ان أحيانا بعض الدول بتعمل تخفيضات على تذاكر الباصات . الأوبشن ده حلو بردو لو انت عاوز تستكشف البلد وتعيش تجربة المواصلات زي المواطن العادي . عيوبها بس انها ممكن متكونش مناسبة لو انت رايح من المطار للفندق او العكس لإن ساعتها بيكون معاك شنط حجمها كبير وبردو لو انت في بلد اللغة الرسمية مش الإنجليزي فـ ساعات هتلاقي صعوبة في انك تعرف اسماء المحطات والشوارع بلغة البلد بس غالباً مشكلة اللغة دي نقدر نحلها مع ابلكيشز زي Google Translate و Google Lens وعشان تعرف كل حاجه عن جدول ومواعيد الباصات في البلد اللي انت رايحها في ابلكيشنز زي Moovit هيكون مفيد جداً.
الأوبشن التالت وهو المترو أوالقطار و دول بردو سعرهم معقول جدا وهيفيدوا جدا في التنقل بين المدن في الدول اللي مساحتها كبيرة وبتقدر تحجز تذاكر القطار اونلاين وبالنسبة للمترو فهو اختيار ممتاز وفي اغلب دول أوروبا واسيا خطوط المترو بتغطي كل شبر في البلد وبتوصل للمطار بكل سهولة وهتقدر تتحرك بسهولة في المترو من غير م تخاف انك تتوه عشان الخطوط والمحطات بتكون مميزة بألوان مختلفة. بس خلي بالك في دول في قارة أسيا زي كوريا الجنوبية مثلاً مفيش موظف هيقطعلك التذكرة في المترو وهتقطع تذكرتك بنفسك على الـ machine فـ خليك مركز واعرف اسم المحطة اللي انت فيها و المحطة اللي انت رايحها عشان تقطع تذكرة صح.
الأوبشن الرابع معانا هو الـ Ridesharing زي Uber و Bolt وغيرها من الأبلكيشنز ... الأوبشن ده value for money ومناسب لو انت عاوز تتحرك زي م بنقول من غير بهدلة وبيكون مناسب للإنتقالات من المطار للفندق والعكس وساعات الابلكيشنز دي بتعمل promo codes بتدي تخفيض ظريف على رحلاتك واحتمالات انك تتوه او تروح مكان غير اللي انت عاوزه قليلة جداُ لان السواق بيتحرك زي الـ maps بالظبط ... ممكن يكون عيبها الوحيد ان اغلب السائقين في بعض دول اوروبا زي دول اوروبا الشرقية مش بيتكلموا انجلش كويس بس مش مشكلة كبيرة يعني وبردو ساعات لازم تدفع تكلفة رحلتك كاش بدل م تدفع بالكريديت كارد.
الأوبشن القبل الاخير معنا هو الـ Carpooling وهو انك تركب عربية حد رايح نفس مشوارك وبتدفعله تكلفة المشوار ده
والخدمة دي ليها ابلكيشنز معينه زي Bla Bla Car ... مؤكد التكلفة للمشوار هتكون أقل من كل الإختيارات اللي فاتت بس ممكن لبعض الناس وخصوصاً البنات متكونش أمان بنسبة 100% لإنك هتركب في عربية شخص غريب عنك .
الاوبشن الأخير هو انك تتمشى على رجلك :) ودي قطعاُ الطريقة الأقل تكلفة على الإطلاق وهتسمح ليك انك تستكشف المدينة اللي انت مسافرها بس طبعاً اوعى تستعمل الأوبشن ده في المسافات الطويلة عشان متتعبش إلا لو انت شخص رياضي جداً :)
وبس كده ...