الكريديت كارد في السفر (مقال بالعامية المصرية)

أول حاجه لازم تعرفها ... هي ليه يفضل إنك تستخدم الكريديت كارد Credit Card ومتستخدمش الديبت كارد Debit Card ؟

ده لأن الديبت كارد زي م إنت عارف بتكون مربوطة بحسابك مباشرة وبيكون ملهاش حد سحب معين إنما الكريديت بيكون ليها حد سحب معين انت اللي بتحدده مسبقا وانت بتستخرجها من البنك ... يعني مثلا لو حسابك فيه ٥٠ ألف جنيه إنت اللي بتقول للبنك عاوز حد أقصى للسحب والدفع – مثلا ١٠ آلاف بس من الـ ٥٠ أو ٢٠ ألف بس من الـ ٥٠ وهكذا ... ف دي طبعا ميزة عن الديبت لإنك بتحط سقف لإجمالي عمليات الدفع والسحب بتاعتك.

وكمان في الديبت اي عملية سحب أو دفع بتتخصم في ساعتها من حسابك ... إنما الكريديت غالبا مبلغ السحب أوالدفع هيتخصم بعدين وده حسب بردو ما انت محدد مع البنك بتاعك يعني مثلا تدفع اللي عليك قبل مرور ٥٥ يوم وهكذا... وكمان بيكون في إمكانية إنك تحدد مع البنك مسبقاً نسبة معينة تدفعها من إجمالي المبالغ اللي عليك ... زي مثلا إنك تدفع ٣٠% من الإجمالي وهكذا ...

ده غير طبعا مميزات تانية للكريديت كارد بتقدمها بعض البنوك على بعض فئات الكروت. زي فئة الـ Platinum اللي بيها ممكن تأخد مثلا كاش باك أو نسبة خصم كويسة لما تستخدام الكارت في المشتريات وطبعاً إمكانية التقسيط وكمان إمكانية دخول صالات الإستراحة VIP Lounge ببعض المطارات مجاناً.

نيجي باه لـ ميزة إستخدام الكارت - سواء ديبت أو كريديت - عن الكاش واللي ظهرت بقوة بعد جائحة الكرونا ووضع بعض الدول شروط لدفع تكلفة تأشيرة الدخول بالبطاقة الإئتمانية زي مثلا السعودية لما قالت إن الكاش غير مسموح بيه عند دفع تكلفة التأشيرة السياحية لدخول المملكة.

وزي بردو معظم الخدمات المقدمة في دول كتير حول العالم وخصوصا أوروبا اللي معظمها وإن لم يكن كلها بقي أونلاين زي إنك تحجز كرسي ف باص أو تأجر عربية أو تدفع تكلفة فسحة ليك هناك بل إن كتير من دول أسيا بردو معتمدين بشكل كلي على إستخدام الكروت فقط عند الدفع زي الصين اللي صعب جداُ تلاقي فيها دفع بالكاش.

بس بردو ده لايمنع إنك يبقي معاك كاش إحتياطي من نفس عملة البلد لإن أحيانا بعض الخدمات في بعض الدول زي دول أوروبا الشرقية ودول منطقة البلطيق لسه بتعتمد بشكل جزئي – صغير - على الكاش زي إنك تدفع تكلفة تاكسي أو تشتري حاجة من سوبرماركت صغير.

نيجي باه لأخر جزئية ف مقالنا وهي إنك لو ناوي تستخدم الكريديت كارد ف السفرية فلازم تأخد بالك من كام حاجه كده تعملها قبل ما تسافر زي إنك تتأكد إنك مسدد كل المبالغ المستحقة عليك عشان متلاقيش الكارت إتوقف فجأة وإنت هناك وكمان يفضل إنك تروح البنك قبل السفر تعمل تحديث لبياناتك وتتأكد من تفعيل خاصية الـ OTP وتشوف إمكانية إنك تأخد كارت جديد فيه خاصية Contactless ومهم جدأ كمان إنك تبلغ البنك إنك مسافر لدولة كذا وهتقعد هناك مدة كذا وتعرف شروط وحدود السحب والدفع في الدولة اللي إنت مسافرها وكمان مهم جدأ تبقي عارف أسرع طرق التواصل مع البنك أثناء السفر وده لو محتاج توقف الكارت في حالة لقدر الله الكارت إتسرق أو ضاع منك وهنا بتظهر تاني أهمية إنك يبقي معاك جزء كاش إحتياطي تمشي نفسك بيه ف الوقت ده.

وطبهاً مش محتاجين نأكد عليك إن بيانات الكارت بتاعك هي حاجة في منتهى الخصوصية ومينفعش بأي حال من الأحوال حد غيرك يطلع عليها أو يبقي عارفها زي رقم الـ CVV اللي بيكون في ضهر الكارت وأكيد كمان رقم الكارت نفسه.

وبس كده ...