الفيزا الشنجن إترفضت ؟!!! (مقال بالعامية المصرية)
اعمل ايه لو الفيزا الشنجن بتاعتي اترفضت ؟ وايه هو خطاب التظلم ؟ اكتبه ازاي ؟ واقدمه امتى وفين ؟
حصلت معاك قبل كده إنك جهزت ورقك وقدمت على الفيزا الشنجن ودخلت فـ مود خلاص إنك مسافر وإذا بك تفاجئ بجواب الرفض بدل ما تلاقي إستيكر الفيزا مطبوع جوه الباسبور ؟ فـ الحالة دي متخافش لسه في أمل انك تاخد الفيزا وتسافر ...
أهم سؤال هنا ؟ هل انت واثق من ان كل ورقك اللي قدمته سليم وتمام ؟ لو إجابتك ايوه ... يبقى إطمن دلوقتي عندنا فرصة كبيرة فـ إنك لو قدمت خطاب تظلم للسفارة يتقبل ويدوك التأشيرة وتسافر ...
بس الأول تعالا نعرف ايه هو خطاب التظلم ؟
خطاب التظلم او الطعن علي قرار رفض الفيزا هو خطاب بتبعته للسفارة بتعترض فيه علي قرار رفض الفيزا بتاعتك .. طبعاً الإعتراض علي القرار بيكون عن طريق شرح مقنع ومختصر بإستخدام كلام منطقي و تقديم مستندات جديده.
ايه أول خطوة تعملها عشان تكتب التظلم بطريقه صحيحه ؟
اول حاجه لازم تقرأ كويس جدا اسباب الرفض عشان على اساسها تعرف تكتب تظلم مدروس يثبت ان اوراقك سليمه
وده لان اللي هتكتبه في جواب التظلم بيتوقف أساسا ( علي سبب الرفض ) اللي مكتوب في خطاب الرفض المرفق بالباسبور وساعتها تعرف كويس انت هتكتب ايه وتحضر مستندات ايه ترفقها بخطاب التظلم وبالتالي تدعم موقفك.
امتى تقدر تقدم التظلم ؟
تقدر تقدم التظلم من شهر لـ شهرين من إستلام جواب الرفض وغالباً ده بيكون مكتوب في جواب الرفض.
طب أخد بالي من ايه وانا بكتب خطاب التظلم ؟
لو انت مثلا اترفضت عشان كشف الحساب البنكي ضعيف يبقي بتحاول تدعم موقفك المالي ومالوش لازمه تقوله انك مثلا حاجز فندق.. ركز بس في سبب رفضك .... وهكذا لو في مشكله في خطاب ااـ HR هات واحد جديد.
إبعد عن الكلام الإنشائي و جمل الشرح الطويله ... خليك محدد و اكتب الخطاب على هيئه نقط وخليك واضح و مختصر
وخلي عندك ثقه في نفسك وخليهم يحسوا انك بتتكلم بقوه وانك صاحب حق وانك مش هتموت يعني لو مخدتش الفيزا
وكمان السفارة مش بتقولك سبب الرفض عشان تبعتلها تاني نفس الورق اللي بعته قبل كده . دائماً دعم موقفك بـ اوراق جديدة.
طيب ايه هي اهم الفقرات اللي لابد تكتبها فـ خطاب التظلم ؟
- أول حاجة بتكتب التاريخ واسم السفارة و موضوع الخطاب
- وبتبدأ بعد كده بكتابة بياناتك الشخصيه... اسمك بالكامل وتاريخ ميلادك ورقم الباسبور وعنوانك الحالي وأرقام التواصل معاك زي الموبايل والايميل
- لازم تكتب التاريخ اللي تم اشعارك فيه بأن طلبك اترفض وطبعا رقم الأبلكيشن وده هتلاقيه مطبوع في اعلي خطاب الرفض
- هتكتب بعد كده السبب اللي تم رفضك بسببه...
- دلوقتي ده اهم جزء و ده هتكتب فيه ليه انت شايف ان قرار رفضك ده مش صح و تثبت بالمستندات ان ورقك سليم و انك من حقك تاخد الفيزا وطبعاً متنساش إنك تبعت المستندات الجديدة مع الخطاب.
- في الاخر توقع الجواب وتكتب التاريخ وتبعته للسفارة بالبريد او الايميل او تسلمه شخصيا وده بيكون حسب قواعد إرسال التظلمات اللي بتحددها كل سفارة.
وبس كده ...